英超球隊利物浦今季表現麻麻，前4無望不突止，仲要俾同市死敵愛華頓，喺聯賽榜騎住。適逢今季隊中中堅加歷查宣佈退休，紅軍即時出招，不停抽水博關注。點解要咁做？喂，個個死敵都有新聞，自己梗係都要有啦，輸人不輸陣嘛！
加歷查掛靴相抄老費
曼聯領隊費格遜上周宣佈退休，紅魔即時喺官網同facebook整咗張「#THANK YOUSIRALEX」嘅相。呢邊廂紅軍又有一代忠臣加歷查季尾掛靴，利記喺面書都整咗個「#thankscarra」嘅封面圖片。
等陣，望一望兩張，做咩咁鬼似嘅？利記係咪有心抄襲冇人知，但係以時間睇，利記確實係遲咗一步！
兩隊一世死敵，但係紅軍竟然頴爛塊面，走去搵老費做訪問講加歷查。雖然老費對「穩健先生」嘅忠心耿耿有讚冇彈，但係兩者之間好似唔多關事囉。
紅軍instagram寸車仔
咁都算，車路士啱啱打低賓菲加，奪得歐霸冠軍，利記咁都要抽水！佢哋周四喺官方instagram，上載咗紅軍01年勇奪歐協盃（現名歐霸盃）嘅捧盃相，紀念球會完成歐協盃、足總盃同聯賽盃「小三冠」創舉，好似寸緊車仔今年只得歐霸一個獎盃咁。
紅軍係咪有心抽水，就等各位看倌自己定奪；但係次次都係慢人一步先做嘢，就真係好肉酸囉！希望利物浦下一季成績可以回勇，唔使再抽人水啦。