早前謝霆鋒答應做內地湖南衛視搞嘅《2013快樂男聲》評判，呢個比賽盛事好似同香港發歌星夢嘅人冇關咁，原來唔係呀，nowTV得到湖南衛視授權，將會成為「香港直通區」，遲啲有比賽會選10個唱得之人直入7月喺北京舉行嘅決賽，接受霆鋒嘅考驗。
後日試咪
《2013快樂男聲》香港直通區嘅初賽，嚟緊後日（19日）喺旺角行人專用區舉行，自問係唱得之人嗰日下晝可以去試咪，大會會幫參賽者拍低一分鐘錄像，然後由蘇永康、伍樂城同now高層何麗全組成嘅評判揀選，再經過月底嘅決賽選拔，最後選10個香港代表7月去北京同內地代表鍊過，參賽者真係可以由旺角唱到北京呀！
其實之前無綫同亞視分別有《超級巨聲》同《亞洲星光大道》畀人演吓身手、發吓歌星夢，但𠵱家兩個節目都停咗，無綫只搞個《星夢傳奇》畀藝人參賽，𠵱家總算有個機會，入咗北京決賽嘅參加者，起碼可以見到謝霆鋒吖！聽聞教唱歌嘅張崇德、雷有輝、李健達都會帶埋徒弟去香港直通區嘅選拔賽一展所長，碰碰運氣㖭。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！