今屆立法會民建聯出咗個惹火議員──元秋蔣麗芸，佢喺議會唔夠一年，就以高分貝發言四圍辣火頭響朵，最新被辣㷫嘅對象就係佢「同黨」，立法會黑哨主席曾鈺成。話說佢前日見拉布議員拉得咁過癮，又學人東拉西扯離題亂噏全民退休保障，結果俾黑哨打斷佢發言，即時大發嬌嗔話曾鈺成「蝦」佢。
話要背熟《議事規則》
元秋同黑哨鬧得不愉快，黨友總要搭個落台階畀佢哋言和。八方聽聞今日牛一嘅元秋噚日已經放風提醒黨友。收到暗示嘅民記中人，話會畀面做啲嘢。咁啱黑哨星期五生日，大家決定順勢幫佢哋慶祝兼擺和頭酒，黨主席譚耀宗笑言：「順便切埋和諧蛋糕。」
元秋就話，相信今個生日會好難忘，皆因被困立法會，喺噹、噹、噹、噹嘅投票鐘聲中度過。
不過，元秋其實對黑哨公開落佢面耿耿於懷，仲話要的起心肝背《議事規則》，睇嚟佢真係諗住提升戰鬥力，日後再同黑哨過招。八方覺得，新丁議員溫吓書固然係好事，但議政能力唔係話背吓規則就可以提升到囉。
本身係梁粉嘅元秋，曾經為保狼英發表「唔少男人連自己結婚紀念日都記唔清楚，何況係花棚」嘅偉論，今日係佢58歲牛一，唔知佢老公又記唔記得呢？
元秋相信老公唔會記得佢生日，反而早幾日去馬會食飯，職員提佢生日月份買嘢有85折，佢惟有𠱁吓自己，即場買咗個袋當生日禮物喎。
李八方
mailto:[email protected]