無綫黃金時段劇集收視差到唔見得人，上周播完嘅《神探高倫布》慘不忍睹，呢個星期緊接嘅《情越海岸線》終於有番少少起色。呢類小品式喜劇平時冇乜人講，今次反而成為收視之冠，周一同周二分別有平均26點（約167萬觀眾）同27點（約173萬觀眾），比起重頭劇《金枝慾孽貳》嘅平均19點（約122萬觀眾）同20點（128萬觀眾）高幾班，起碼師奶睇得明。
「加咗三個pad」
為咗谷收視，無綫喺宣傳片上已大灑鹽花，李綺雯（𡃁妹）俯身大晒32B身材，有網民更抵死將劇名改為《情慾事業線》，𡃁妹噚日喺電話叫大家唔好期望太多，佢笑晒口話：「唔好叫我BB呀，叫我𡃁妹AA啦！識我嘅人都知我冇事業線，只有地平線！」佢話條事業線只係人手加工，仲係黃浩然要求：「劇情要我色誘沈震軒，我加咗三個pad，連背脊啲肉都推埋上前面，加埋燈光同角度，絕無僅有！」前日嗰集仲有年逾30歲嘅李詩韻扮學生妹，憶起同陳展鵬偷食禁果，由梳化咀到落地下。
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://hk.add.nextmedia.com 睇番足本網上版，除咗有專訪外，仲有好多時裝靚嘢睇！