曾經係新股推介會常客嘅「女股神」劉央，唔知係咪太「燈」，好耐冇見佢現身推介會，佢對上一次高調現身推介會，已經係舊年11月隻人保（1339）。低調一輪，劉央噚晚突然強勢回歸，以黑色透視低胸裝，配上十足行頭閃爆登場，出席「賭后」何超瓊（Pansy）旗下天機公關公司嘅廿五周年晚宴。
難得見到潛水一排嘅劉央，咁啱近期有多隻新股出閘，實要問佢有乜心水啦。佢竟然一改大好友作風，冇一味唱好，指近期新股市場「too boring」。雖然悶，但佢都拎近4億認購中石化煉化（2386），至於銀河證券（6881）就研究中。可惜銀證截咗飛，劉央可能諗住等佢上咗市先買啩。
郭炳湘甩底
女股神這邊廂閃爆現身，那邊廂嘅主人家「賭后」Pansy絕唔輸蝕，一襲低胸綠色晚裝，相當雍容華貴。Pansy話，25年前成立天機公關，大家以為佢玩玩吓，佢自己都估唔到可以玩足25年，公司將來會拓展埋中港兩地嘅財經公關工作。
見到賭后，問起佢阿爸賭王何鴻燊嘅近況，佢預告，下月父親節，會同賭王一齊喺屋企食飯、切蛋糕慶祝，認真孝順。本來噚晚應該仲會見到新地（016）非執董郭炳湘，點知佢甩底。
李華華
mailto:[email protected]