在校友會午餐會見到沙膽虹，稀客也，佢話專程自將軍澳出嚟，想聽吓校友Ｗ教授講習李上台後之中國未來十年展望。可惜吖，每次午餐演講都係一點半開始，Ｗ教授講咗三分一，沙膽虹已經要走，將軍澳與中環距離幾遠，身為總編輯，下午準時上班係要以身作則嘅。
日前沙膽虹在專欄談及全民退休保障，期期以為不可，左丁山深有同感，本欄老早已表達反對之意，但政客擅於利用民粹，趁梁振英政府民望低，趁機向佢施壓，作為停止拉布嘅代價，曾俊華唔係儍仔，梗係拒絕啦，假如佢真係怕咗陳偉業、梁國雄嘅拉布威脅而讓步，叫佢辭職走去做劍擊教練啦，唔好做壽臣山花園別墅中產。
泛民政客抽水，建制工會政客亦不輸蝕，陳婉嫻大罵梁振英不承諾推行標準工時，要求有標準工時立法時間表，明顯係強梁振英所難，佢唔係唔需要商界功能組別議員支持嘅，商界透過香港總商會議員林健鋒清楚說明：寸步不讓，試問冇功能組別議員支持，標準工時如何可以立法（按：全民退休保障亦然），陳婉嫻如果睇唔順眼，不如與梁國雄、李卓人聯手，推動廢除功能組別，立法會全面普選，陳婉嫻夠唔夠膽呀？
最低工資加薪，已令餐飲業工人短缺，如再加上標準工時，相信餐飲業會急速自動化，向日本食肆學習，食客先在售票機買票，再向櫃枱落單，慳回一個收銀員，大家樂已有分店用呢招。洗碗碟方面，除咗買入洗碗機之外，聽餐飲Ｗ講，據佢所知，已有兩家自動洗碗碟公司在工業大廈開門做生意，動用百零萬港元購買機械，用貨車向食肆收集碗碟回廠清洗，洗完送回食肆，餐飲Ｗ話：「好多食肆根本請唔到女工男工洗碗，呢個方法有得諗㗎，你不妨在火炭租工場，專做沙田食肆生意！他日如有標準工時，擔保生意更好！」哦，洗碗外判，確係商機，諗通收碗洗碗送碗個流程就掂。李卓人陳婉嫻好憎外判，但佢地嘅勞工政策恰好係增加外判嘅催生劑！