台灣天團五月天合共八場嘅紅館演唱會前晚結束，現場氣氛超爆，五子三度安哥唱到夜晚11點45分都未能滿足歌迷，歌迷擾攘到凌晨12點都唔肯離場，但最終五月天為咗主辦單位銀包着想而未有再度出場慰歌迷。而阿信獻唱《離開地球表面》時差啲喺台上跌低。
家強做嘉賓掀高潮
全晚高潮係邀請到黃家強做嘉賓，家強出場時話：「睇五月天演唱會好感動、好激動。」阿信講笑要求家強多讚幾句，家強即話：「可以，真是好榮幸，十幾年前我們已在校園騷見過面，五月天音樂真是非常有個性。今晚這首歌是我送給你們和他，哥哥（指黃家駒）離開了20年。」之後家強唱《海闊天空》，全場觀眾都大合唱。
完騷後五月天接受訪問，對於家強嚟撐場，阿信話：「今年對Beyond歌迷來說好有意義，希望喜歡五月天的朋友都會想起Beyond，唱《海闊天空》時好感動。」
瑪莎首場俾阿信將緋聞擺上枱，他直言冇唔開心，因為大家平日互窒，對於係咪公開同埋默認戀情時，他就笑笑口話：「我從來沒有不公開過。」
此外，阿信噚日到觀塘為自己創立嘅時裝品牌，香港第四間分店進行剪綵儀式，吸引六百人圍觀，他表示𠵱家中、港、台及日本合共有30間分店，亦有意將事業拓展到歐洲。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://hk.add.nextmedia.com 睇番足本網上版，除咗有專訪外，仲有好多時裝靚嘢睇！