每年醫管局研討大會，行政總裁梁栢賢致辭時都會大玩二次創作，噚日佢又將自己同胡定旭兩個個頭key落卡通人物超能先生身上，化身為呢位力大無窮嘅英雄，寓意佢哋帶領醫管局所有員工，一齊拆彈，力挽狂瀾。呢張改圖一出，果然成功博得全場爆笑鼓掌。
梁栢賢噚日個PowerPoint實在係充滿驚喜，佢之後提及醫管局正面對嘅人口老化及人手壓力等難題時，又借用紅極一時嘅電腦遊戲「Angry Birds」，用隻憤怒鳥將呢啲難題通通撞散，睇起嚟相當過癮。
至於多得梁栢賢改圖而有健碩身材嘅「肥胡」胡定旭，噚日用英文致辭時亦搞搞新意思，佢將徐小鳳名曲《順流逆流》嘅歌詞繙譯成英文，仲深情款款咁逐句朗讀，一心希望透過首歌鼓勵台下嘅醫護人員，但結果連台上嘅食物及衞生局長高永文同梁栢賢都忍唔住笑。