【中環石板街】當年「奪麵雙琪」嘅三位主角，梁詠琪嫁咗畀西班牙籍老公Sergio，鄭伊健就娶咗拍拖七年嘅蒙嘉慧做老婆，剩番嘅邵美琪亦同男友施祖男感情穩定，佢哋早排仲俾鄭則仕催婚㖭。前日下晝5點幾，邵美琪同男友又拍拖出巡中環，鬼咁煙韌。
吹風又吹水
前日邵美琪着咗黑白間條衫襯牛仔褲，施祖男就白恤衫襯老牛，兩人都咁鍾意簡約襯到絕！已經48歲嘅邵美琪外形都算keep得唔錯，不過佢副黑框眼鏡似乎有啲鬆，要不時用手托眼鏡；佢哋企喺石板街周圍望搵的士，但等咗15分鐘都截唔到車，邵美琪同男友惟有邊等邊傾，邵美琪仲俾風吹到頭髮亂晒㖭。
後來終於俾佢哋見到對面街有架的士，兩人急急腳走過馬路上車，施祖男坐定後就掛住玩手機，反而好少同邵美琪交談，好似老夫老妻咁唔擔心冷落女友，之後佢哋就返咗位於天后嘅屋企，享受同居生活嘅佢哋，唔知幾時先肯派帖呢！
採訪、攝影：楊浩賢
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://hk.add.nextmedia.com 睇番足本網上版，除咗有專訪外，仲有好多時裝靚嘢睇！