前輩高彰坡昨日推一推，隻威華達（622）即日怒升19.1%，收報0.218元，認真勁！睇個勢仲有排去。
不過，小弟認為，威華達阿媽、揸威華達36.6%嘅百仕達（1168）可塑性更強！百仕達因為手頭冇乜土儲，近幾年已經冇乜新樓盤賣，淨係得啲投資物業同37億幾現金喺手，可以話係一隻殼，不過係靚嗰隻──淨係cash已相當於每股1.05元，加上業務係內房，同之前被綠地集團借殼上市嘅盛高置地（337）極似，完全符合被大型內房借殼嘅條件。
再深入一啲解構，截至去年底，百仕達持有嘅現金同現金等價資產高達40.08億元，借款總額2.96億元，即淨現金有37億幾元，再折合每股係1.05元；仲有，加埋佢投資物業等資產，每股資產淨值（NAV）高達2.115元。
資產折讓計落抵博
業務方面，淨係得番上海「極小量」可發展地皮，講緊係10萬平方米嘅商住項目，將於2014年完工，係百仕達未來一兩年嘅主要盈利來源，但賣埋就冇，不過好彩，佢喺深圳羅湖有一批投資物業，當中包括總樓面面積5萬平方米酒店加辦公樓嘅百仕達大廈，掹車邊都抽到水話有前海概念。
至於另一嚿值錢嘅資產，就係威華達，但sorry！小弟從來都唔相信母憑子貴概念，個仔得，唔代表阿媽會畀反應，小弟揀百仕達，係博佢自己做嘢，威華達都叫做搵啲頁岩氣搞吓，咁𠵱家未有亮點嘅百仕達，係時候要好似個仔咁發力，佢𠵱家得兩個選擇，一係發憤圖強搵嘢搞，一係賣殼。
睇牌面，後者機會唔低，因為佢嘅條件非常脗合，如果真係賣，可以好似盛高咁，派番啲舊業務出嚟就得，非常之簡單之嘛！昨日威華達怒升，帶動埋百仕達都大漲近11%，但仍距離佢今年個高位、每股現金價同NAV好遠，好抵博呀！
總之，出名「惡炒」嘅威華達都終於肯做嘢，相信百仕達都係時候要郁！
陳承龍
本欄逢周四刊登