上市公司召開股東會後，通常送點心盒、餅券畀小股東，送八達通真係好少見。銅鑼灣大業主希慎（014）就專登整咗500張內附100蚊嘅特別版八達通（圖），喺噚日股東會送畀在場二百多位小股東，餘下嘅八達通就要諗計睇吓點送埋出去。
希慎公關解釋，旗下重點項目希慎廣場舊年開業，加上有其他商場完成翻新，故製作一批八達通畀小股東作為紀念。照咁講，唔會年年都有得送。
小股東收到呢份禮物都算驚喜，但亦有小股東不滿希慎租用其他酒店場地搞股東會，質疑點解唔喺自己主場搞，等小股東順道參觀。既然有小股東咁畀面，主席利蘊蓮當然笑晒，答應會考慮呢個建議。