「低調雄」曾偉雄嘅「低調通緝」謬論惹來全城「恐慌」，連藝人歐錦棠都差啲俾佢嚇親。棠哥噚日原本要去法庭做證人，點知佢「處男落court」白行一趟，去到個犯已認罪。棠哥忍唔住喺facebook呻：「盡公民責任，我點都要到……我更驚唔出庭會俾人低調通緝」。
為女食客被打作證
原來棠哥舊年12月去美孚一間酒樓目擊女食客俾男人打。兩個月前佢收到證人傳票，叫佢噚日去觀塘裁判法院畀口供，差人當時同佢講，個犯傾緊認罪，到時可能唔使勞煩佢。棠哥話：「我有同佢講呢排忙，咁佢拍晒心口話一定會通知我。」結果當然係冇收過電話，前日佢不停打畀嗰位差人，對方潛足成日水，佢噚日惟有照去法庭囉。
佢未去過法庭所以專登早啲到，點知越等越唔對路，突然出現咗當日幫佢落口供嘅師姐，師姐好驚訝問：「點解你嚟？個犯認咗喎！」棠哥同八方講，自己行得正企得正，但都擔心對方擺低幾年之後，等佢唔記得件事再嚟低調通緝。律師梁永鏗就話證人如果無恰當理由遲到或缺席，可以俾人告藐視法庭㗎。