升市兩大元素：資金及市場氣氛。只要資金流入，加上投資者樂觀，股票就會升，反之亦然。基本因素變得次要，揀股短炒，越低殘升得越勁，產能過剩、蝕到入肉的光伏、節能照明、電池股昨日全線飆一成，資金湧入博一兩棍反彈，僅此而矣。經驗說明，去到呢個非理性階段，距離調整不遠了。
魏力唔係叫人離場，只係亢奮時亦要保持清醒，小心選股方為上策。內房殼股低位蠢蠢欲動，中長期潛力大，可睇高一線。盛高置地（337）獲綠地集團入主，復牌飛升一倍；積華生物（2327）亦升六成。要吼同類概念股，兼具圖靚、貨乾、前景亮麗等優點，首選萬科置業（1036）。
萬科去年收購南聯地產，易名萬科置業，定位為萬科的海外業務旗艦，迅即大展拳腳，今年初夥新世界以34億元奪荃灣西站地皮，連同近期大舉拓展北美及新加坡樓市，長遠勢將注入萬科置業。
目前該股市值僅35億元，獲注資後升幅將數以倍計，趁低價收集，中長期回報可觀。
去年收購後最高炒上19元水平，至今反覆整固八個月，貨源落入強者之手，隨時炒上。東力實業（978）昨率先大升16%，萬科置業接力爆上理由充份，中線先睇高位19蚊。
魏力
http://www.facebook.com/2012jason
本欄逢周一、二、四、五刊出