呢幾日個個都講緊長實（001）嘅雍澄軒斬件賣唔出事件。我哋《蘋果日報》最緊貼社會脈搏，最代表市民諗嘅嘢，喺2月19日鬧長實冇示範單位。到3月15日，喺篇講行家買咗坐艇嘅動新聞度，仲用「雍澄軒個單位」去形容啲買家買緊乜。
原來「單位」係講緊我哋每月被強迫買嘅強迫金中嘅基金單位，我真係唔知添！呢單嘢擺到明係證監嘅施衛民喺度empire building，無視衍生出嘅公共政策下嘅受害者。
呢幾年係咁打本地行
今次長實斬件賣雍澄軒，貨幣政策嘅後果，係將量化寬鬆印出來嘅鈔票排洪。當呢個做法變普遍時，嗰班（包括好多高官同傳媒高層）買樓收租嘅投資者，可以有個更高回報嘅選擇。
不過更緊要嘅係，呢啲投資者，就唔使同嗰啲學又唔番，鍾意日日搞社運，不過又想做業主嘅社會棟樑爭住宅買。你搞咁多SSD、BSD都係為咗佢哋，同呢啲單位，同買呢啲單位嘅按揭唔好變壞賬！
原來，喺2001年證監都試過殺停長實賣樓時，同恒指掛鈎嘅賣法。咁啲年長嘅讀者，你哋都知當時樓市乜樣，長實咁做係希望用啲新嘅方法，睇吓可唔可以托吓個樓市。如果呢招冇禁到，又work，樓市（都唔計SARS一役）如果早啲見底，2002年會唔會有咁多嘅受害者？
負資產先會咁消極走去燒炭死，不過今時今日，經過證監認可嘅迷債事件後，受害者嘅社會棟樑就會圍你政總（希望佢哋唔會戇到走去圍想排洪嘅長江中心），到時又有大把報道話西環施壓要維穩。
證監嘅施衛民冇話唔畀你將雍澄軒斬件賣，試問，一個迷債都批嘅機構點會唔批雍澄軒斬件？不過睇證監呢幾年係咁打啲本地行，長實只要搵啲外國大投行搞銷售就得。所以，長實再要賣，最好搵黃元山，呢個前雷曼結構性產品主管囉！
孫柏文
獨立股評人
http://facebook.com/shuen
本欄逢周二、四刊出