香港小交響樂團最近跳出香港，由音樂總監葉詠詩帶隊，去咗日本新潟同東京，喺「熱狂之日音樂節」表演。呢個音樂節，係每年4月底至5月舉行，因為係呢個時候，日本會有一周長假期，樂迷就有足夠時間去聽演奏會。新潟嘅音樂節以莫扎特做主題，每場音樂會，門票約2,000円，即係唔使200蚊港紙。
咁啱新潟搞緊櫻花節同鬱金香節，樂團可以順道賞花。去到東京仲開心，表演場地係有1,800個座位嘅音樂廳，同埋法國、以色列、日本嘅鋼琴家合作表演，共演出六場。
成個音樂節有近300場演出，小交響樂團嘅樂師，最忙唔係要去表演，而係要忙於撲飛，欣賞其他樂團嘅演出。