大淡友瑞銀，近3年來一直給予利豐（494）「沽售」評級，日前終於調升rating至「中性」，足以令利豐單日彈升8%。呢隻股份近年來係空軍名單上的「Must Short」，𠵱家連瑞銀都決定先收手，空軍們仲唔鳴金收兵take profit？故呢一浸升幅，大部份由沽空平倉盤帶動，海迪相信會再夾多一陣。
主席馮國綸日前溫馨提示，公開說今年盈利會傾斜在下半年，上半年亦不會有回撥收益云云，似是在降低市場對8月中期業績的預期。海迪記得利豐在去年中期業績前，亦曾經如此放風，說全年業績會成「上半年30%、下半年70%」之比，着投資者不用擔心。最後上半年表現的確是肉酸，但下半年卻沒有如承諾般做到餘下的70%，盈利只比上半年高少少。而利豐就在中間未有壞消息出爐的空白時間，成功發咗個混合債券，抽水39億元。
利豐有否出口術buy time？海迪唔敢咁講。但海迪相信，利豐的經營問題是屬於結構性，即受行業轉型、中國採購成本不再便宜等大趨勢影響，而非簡單可以隨周期復蘇。希望利豐今次說到做到，否則後果不堪設想。
海迪