滙豐控股（005）行政總裁歐智華，噚日再主持策略日，喜歡拳擊同揚帆出海嘅歐總，兼具打拳講求快狠準，同航行要方向清晰嘅性格，雖然證券界對佢噚日所公佈嘅內容，覺得缺乏驚喜，股價冇乜反應，但無損歐總靚靚心情。
喺長達三個幾鐘嘅獨腳演講，歐總以明亮聲線、高速輸出大量數據，情緒亦有啲亢奮，時而加重語氣，展示強勢，時而貫徹幽默抵死作風。
過去幾年，集團高層有五成已經退休或換人，不過新加入嘅成員都好掂，解決監管合規問題亦高度有效率，歐智華講講吓仲爆料，話唔少有表現嘅員工，「appraisal（考勤）會寫得好好」。