阿仙奴小將艾朗藍斯日前喺主場對韋根場波，射入自己今季第一個聯賽入球，助球隊大勝4:1。原本應該係一件值得開心嘅事，但係網民見到佢入波就即時心慌慌，紛紛討論「藍斯魔咒」下一個受害者。
鴨仔漏氣都關事？
話說2011年有唔少知名人士去世，網民無意中發現，佢哋死嘅日子同藍斯仔入波時間好接近，好似佢入親波都有大人物死一樣，即時被香港網民封為地獄黑仔王。網民們仲搞笑話藍斯好彩入波唔多，唔係人類就大件事㖭。而且佢幾次生日都多災多難，08年雲南昆明4.3級地震，正係發生喺佢18歲生日。
周二佢喺阿仙奴對韋根一賽中，71分鐘射入自己今季第一個聯賽入球，幫球隊埋齋；網民見到呢一幕即時嚇咗一跳，好似見到世界末日前出現嘅異象一樣！無論係外國、香港球迷都即時討論藍斯魔咒，外國球迷出惡搞圖叫大家小心，香港球迷就直情傾將會死邊嗰！唔少人主觀願望想689講bye bye，亦有人話隻Rubber Duck漏氣明顯就係多得艾朗藍斯。689雖然討厭，但係講句公道說話，做人都唔可以咁黑心。至於隻膠鴨就算啦，藍斯仔入波前佢已經漏氣，錯晒時間。
今次死嘅係韋根
有網民話其實已經一早出現咗足下亡魂。邊個？咪就係韋根囉！韋根氣勢正旺，贏波可以博留班，但係𠵱家輸波降班，仲要因為咁而成為第一隊要降班嘅應屆足總盃得主，咁都死得唔夠冤枉呀？