雖然女人任何時候都可以搵到shopping藉口，不過，經濟唔好，難免會節制一下，睇住個荷包買心頭好。本地服裝股面對中港經濟放緩、銷售下跌、成本及存貨增加等多重打擊。再加上多個外國品牌H&M、Zara、Uniqlo等都來香港插旗，最新消息更指出，英國品牌Topshop下個月將會進駐中環，一於向H&M挑機！
I.T炒高僅曇花一現
市場競爭更加激烈，本地服裝股前路相當難行。如剛派發成績表的I.T（999），全年少賺19%，縱使股價放榜後一度炒高，但里昂已提醒大家，預計今年同店銷售繼續唔掂，睇唔清前景，繼續唱淡兼削目標價。所以，I.T短暫炒高後，都開始打回原形。
至於另外一間老品牌佐丹奴（709），首季業績亦冇睇頭，內地業務倒退更為嚴重，但樓上欄主王昇噚日教路，指佐丹奴不宜短炒，不過好「息」之徒就可以考慮入貨，皆因股息率高達5厘。摩通都預計今後三個年度，佐丹奴股息率分別為4.9厘、5.3厘、6.3厘，繼續給予增持評級。一於傳授另類投資心法。
當然，要做好「息」之徒，都要承受得起風險。不論本地或是外國品牌，最終目標都是想攻入龐大的祖國市場。但短期內祖國消費市場難以回復當年勇，本地服裝股隨時要面臨內地業務惡化的長期戰，限制股價表現。
瑪姬兒