噚日Sony成為全球熱話，有賴公司大股東──對沖基金Third Point突然向Sony提出分拆最多兩成娛樂業務上市，仲話咁樣可以將股價提升60%。
提起Sony，好自然就諗起電子產品。不過Sony上星期公佈嘅靚仔業績就睇到，電影業務可以話救佢一命。全年虧轉盈，由上年度蝕4.57億美元，一年後就轉賺4.58億美元。當中《蜘蛛俠：驚世現身》同埋《新鐵金剛：智破天凶城》大收，Sony Pictures經營收入激增四成。
Sony電子產品目前肯定輸畀蘋果、三星N條街，但多得幾部電影吊住條命。有分析員計過條數，Sony娛樂業務目前僅8倍PE，遠低於同業嘅10至11倍，好明顯呢個業務係一隻金蛋。
以日企一向作風，唔會咁易就範，相信Third Point冇理由唔知呢個道理。當然Sony已極速回應拒絕呢個要求，但借憧憬股價單日炒起一成。陰謀論咁諗，基金似係自己製造消息炒起股價，娛樂業務未分拆，已為基金生出金蛋。
Fifi
本欄逢周二、四刊出