又到升學季節，朋友傳來兩個消息，兩位曾上左丁山寫字樓親自討教嘅世姪、世姪女得UCLA取錄，梗係開心啦。世姪女與世姪都係著名英中學校學生，世姪女受唔住老師催谷，雖然成績好，想讀完中五就提前離港，於是左丁山叫佢去咗Foothill以入柏克萊為目標。柏克萊就唔得嘞，UCLA通知佢去參加迎新（Orientation），令佢開心到暈。
世姪就係DSE（文憑試）第二屆考生，應該今年參加文憑試嘅，但佢覺得考試壓力太大，徵得父母及學校同意後，唔參加文憑試，只係攞學校證書，課餘專攻SAT，AP等美國試，考得成績唔錯噃，以呢啲成績申請美國大學，雖然東岸長春藤大學全部拒他於門外，但就得到UCLA取錄，開心啦。左丁山雖然指點過佢如何申請美國大學，但亦感到意外，因為加州大學好少收取海外亞洲學生嘅，美國境內太多超級亞洲學生、華人學生嘞，成績叻極，仍然難以進入加州大學，特別係柏克萊與UCLA，強如小Ｂ，當年得芝加哥大學獎學金入讀，但同時亦吃了UCLA閉門羹！西雅圖華盛頓大學劉教授啱啱傳來電郵，附紐約時報一篇報導，講加州自從在1996年撤銷大學嘅「平權行動」（affirmative action），不准州立大學以種族分類收生之後，拉丁裔與黑人大學生比例大跌，亞裔學生比例急升，於是各分校各師各法，諗盡辦法嚟增收清貧拉丁裔或黑人中學生，其中Irvine分校最積極，每年動用七百萬美元活動費，搵導師、義工、大學生到Irvine地區附近所有中學，特別係貧困地段，周圍尋找有志向、有潛質學生，為佢地補習，指導佢地如何填表申請大學及獎助學金，務求令更多拉丁裔、黑人可以入加州大學，以達到學生多元化（族裔、經濟背景）嘅目的。可想而知，讀書成績更好嘅加州亞裔學生，只好食自己，唔會有大學幫佢地，故此柏克萊、UCLA取錄嘅加州亞裔學生一定係最叻嘅一群，有咗佢地，同是亞裔嘅香港學生申請入學，梗係蝕底嘅啦。世姪以香港學生資格申請，竟可突圍，簡直係半件奇蹟，想來佢亦必有一啲令人特別欣賞之處。世姪女入UCLA反為合符期望呀，先入Foothill，攞夠GPA就可直升三年班，遊戲規則係咁嘅嘛！