資深大律師兼全國政協胡漢清（Alan）嘅84歲母親莊永楚，佢喺3月返港向兒子追討逾2,000萬資產，胡母早前收番上海大宅後，噚日下晝搭4點幾機飛返溫哥華，母子金錢糾紛暫告一段落。
胡母噚日兩點出現國泰商務櫃位check in，好友白韻琹嚟送機兼陪胡母食晏，問Alan有冇同佢聯絡？兩母子係咪和好？Alan係咪還番晒錢？胡母點頭回應，問剛過去嘅母親節點過？白姐姐代答：「冇慶祝，嗰日莊小姐（胡母）去咗做義工。」至於Alan老婆江希文啱啱生咗個女，問有冇見過孫女？胡母話：「未見過，新抱唔喺香港，想見都見唔到，冇話想見邊個。」
唔使個仔養
至於Alan有冇畀零用錢？胡母話：「自己夠，佢哋想畀我都覺得冇需要，一般父母都係咁。」Alan有冇供養佢？白姐姐代答：「佢聽唔到，唔講呢啲住。」係咪出售上海大宅？胡母就話：「我想加拿大同上海兩邊住，自己身體唔好，飛十三個鐘太辛苦。」最後胡母坐輪椅入閘，佢話會再返港。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://hk.add.nextmedia.com 睇番足本網上版，除咗有專訪外，仲有好多時裝靚嘢睇！