伊巴謙莫域助PSG事隔19年重奪法甲冠軍，個人更創下近11年10次為球會奪冠的壯舉，實在是嚇死人。雖然他確係有料，首季踢法甲便入了27球；但能成冠軍保證，最重要，都係識揀工。
伊巴揀工最叻
出身自瑞典馬模，首間大會係荷蘭班霸阿積士，捧盃自然只係時間問題；跟住去意甲祖記，睇準強帥卡比路加球會財雄勢大，輕取兩屆冠軍（其後因電話門事件被賽會褫奪）。在祖記被重罰降班、AC又被罰分下，轉投漁人得利人的國米，為緊接3屆冠軍買了穩陣保險；之後巴塞、AC到PSG，全屬明智決定。財大氣粗的PSG上季都做阿二，今季多埋自己同堤亞高施華，伊巴心諗：「仲有走雞？」若是熱刺、阿仙奴、馬體會這些「次勁旅」邀請，伊巴肯定嗤之以鼻。
留隊對朗尼最好
其實教練先多揀工專家，例如摩連奴與卡比路。他們考慮球會，除了該會財力實力必比國內對手有優勢外，還會先列出一份新兵shopping list，看球會能否滿足才考慮加盟。卡比路由AC、皇馬、羅馬、祖記、再返回皇馬都無甩拖，最後在英格蘭國家隊失手，大概因為英軍不可能為他提供一個shopping list。至於摩連奴，在知道費Sir於曼聯退休後，大概不用再欲蓋彌彰，可立即表明心迹飛去車仔吧。至於面臨揀工抉擇的朗尼，學奧雲話齋，世上財力規模可比曼聯的球會5隻手指數晒：巴塞皇馬踢法不合；轉投紅魔死敵車仔曼城壓力又大，PSG又要抽重稅；如果識得揀，揀留隊好過啦。
方柏翹
now足球評述員