紐約Magnolia之於Cupcake，好比Macaron之於Laduree：世上第一件Cupcake當然冇可能是此店發明，但把Cupcake執來收養、再調校到有名有姓人見人愛，老土的說法是「再生父母」。這是另一個平凡小點飛上枝頭的故事。
記者：劉嘉蕙 攝影：潘志恆
殘羹變上菜
Cupcake，是糕點界的「野仔」，據說最早見於18世紀美國的食譜，而Cup之為Cup，傳說有兩個：一指代表材料的容量，早期Cupcake材料約為「一杯牛油兩杯糖、三杯麵粉四隻蛋」，全用杯仔量度，因而得名；另一說法是，餅廚發明把蛋糕漿倒入杯仔才拿去焗，貪其容量小、傳熱快。正宗的源頭為何？冇人知亦冇人理，反正Cupcake不過是家常小點，不是甚麼國家大事。總之發展下來，許多美國人家裏，只要有個喜歡整餅的親戚，每逢生日過節或結婚，就會見到一兩打Cupcake放着贈興，自然得像你我小學聖誕Party上見到的菠蘿腸仔一樣——唔知邊個發明，食開又慣咗。像你不會在餐廳見到有人賣菠蘿腸仔，美國人本來也沒有人開Cupcake店，直到1996年Magnolia出現。再弔詭一點說，Magnolia本也不打算做Cupcake，只打算整餅整包；直到一天，創始人做了個大蛋糕，剩了些材料，用得唔好嘥，就用祖傳秘方焗了第一個Cupcake，然後再懶靚又鋪上一圈Buttercream……
色慾街坊帶上電視
住Magnolia附近的人有時夜歸，經過餅店，大件嘢一早掃清，就會得到個小小Cupcake填填肚。由此，公餘小習作變成街坊Best Kept Secrets，再適時遇上伯樂，無心插柳下成了國際巨星！
那位伯樂，叫Sarah Jessica Parker，對，就是《色慾都市》（SATC）的Carrie。話說Magnolia Cupcake發迹之時，Sarah剛好住附近；她有份做主角的SATC剛好在找場景，她就很自然的想起了「屋企附近間街坊小店」有些很 Cute的Cupcakes。過不多久，美國的觀眾就在電視螢光幕見到Carrie和Miranda坐在長凳上咬淡粉紅色的Cupcake，再過約莫年多兩年，Cupcake隨電視劇集手牽手打入全球女人的心，成為甜品界新浪潮。
「為甚麼大家愛Cupcake？靚，好味，最重要是Size細呀，可以試多幾種味，感覺上又不太肥！」Magnolia的公關Sara一副理所當然的樣子。對，女人心來來去去這幾樣，放諸四海皆準。
即睇Signature Swirl
店員手起刀落示範Magnolia招牌轉，連埋灑糖十幾廿秒搞掂。「睇落好簡單，有排練㗎！」師傅說。
老老實實冧掂你
今時今日也許你屋企隔籬也有間Cupcake店了，甚至是10種顏色20種口味，Buttercream會變玫瑰心心或蝴蝶結，說多花巧有多花巧。來到「Cupcake再生父母」紐約Magnolia，Cupcake卻是平實到你唔信。一般情況蛋糕底只有呍呢拿朱古力兩種味，面層Buttercream有粉紅、藍、黃、綠、紫、白及朱古力七種色，味道也是朱古力或呍呢拿兩款，特別口味不是節日限定，就是要預訂，不似其他餅店多多花臣。傳說中要40小時才學得識的Signature Swirl，只是老老實實的一個轉，有時貼一小片花，「我們追求Consistency。」Sara說。
Sara坦言，Magnolia冇秘密，Cupcake成份跟你家做的一模一樣，比其他舖頭多了點的，或者叫堅持，「我們所有店都是開放式廚房，你會見到所有工序都在現場做，完全沒有添加劑化學物。硬要說不同，可能是每次都只小量小量的做囉。」Magnolia對品質監控有要求，明明已開張16年多，到近期才加入網購大軍，中間的時間，就花在研究如何令網購Cupcake與現場吃到的一模一樣。
Magnolia現時在美國有7家店，外國4間，集中在中東有錢人區，稍後開東京店，口痕問何時開來香港，看Laduree墟冚到！「想呀，我們也在物色，理想的分店是，保留開放式廚房、50年代懷舊裝修。我們不要做巨無霸開枝散葉，但求少少哋家庭式經營就好。」
Magnolia Bakery
地址：401 Bleecker Street, New York
電話：（212）462-2572
網址： http://www.magnoliabakery.com
下一波甜浪：Cake-cup？
Cupcake之後，有人預言下一波甜品熱潮是……Cake-cup，冇睇錯，Cake in a cup，真係，有個杯的。
就在Magnolia創始店過兩條街，去年12月底Cake-cup店Bee's Knees Baking Company開張，馬上取得所有人關注，連英國傳媒都派人報道。
Cake-cup原本是網上生意，Billy愛整餅，就跟兩位拍檔接些婚禮及派對到會來做。他們的蛋糕，有芭菲或英式Trifle的影子，將一堆材料倒入威士忌杯，保持質感濕潤軟滑。打出小名氣後，時尚雜誌來拍照，Banana Republic也幫襯。有市場，負責整餅的Billy，就把心一橫辭去地產工作，專心一致做餅佬，感覺係「好正，好開心！」做街客，他們用膠杯仔代替威士忌杯，長備8至10款口味，如朱古力蛋糕底溝花生醬、呍呢拿蛋糕底配紅苺醬及白朱古力Mousse。知你心大心細，又推出細碼拼盤版，一次過試勻多種口味。
Cake-cup是有條件紅的：味道好、樣靚、唔會整污糟手、可以行住食不怕溶。試完第一口，我的反應是：有冇興趣去香港開舖？我幫你手，「哈，好提議！」他日一唔小心紅咗，也許我就會成為華人地區Cake-cup之母了。
Bee's Knees Baking Company
地址：113 W. 10th St.New York
電話：（212）989-6400
網址： http://www.beeskneesbakingco.com
朝聖貼士
紐約遊客區的Magnolia，全天候人頭湧湧，買完冇地方食。想坐低食個Tea，小記畀貼士大家，去Columbus Avenue的一間，座位最多，環境夠靜。至於在SATC中出現的創始店，位於West Village的Bleecker Street，較為逼狹，冇位坐，但沿路是豪宅及High-end Boutique，可以扮Carrie懶優雅地周街咬Cupcake。
