民主黨上次立法會選舉失利，各區都要部署反擊戰，八方最近聽聞該黨做過廉署調查主任嘅總幹事林卓廷，磨拳擦掌計劃出戰下屆立法會，仲食住最近全城狙擊貪湯個勢，高調回應爭取曝光。
噚日佢嘅黨主席劉慧卿請佢上自己個網台節目大談貪湯，「自己人請自己人」做節目，唔知係咪有心畀位佢上呢﹖卿姐聽到哈哈大笑，話政治一日都嫌長邊話得埋，不過每個有心選舉嘅黨員都應該做好準備喎。
講番個節目，阿廷話有廉署高層呻，湯顯明做廉政專員簡直係五年浩劫，唔少高層疑似頂唔順而跳船，有啲做到就嚟退休都劈炮，搞到廉署青黃不接，有段時間廉署七個最高層（七小福）竟有六個係署任，大家就明發生乜嘢事啦。