工聯會亡國興為咗「高調宣揚」佢對拉布嘅不滿，噚日窺準主席曾鈺成召開完剪布閉門會議後，即時動筆寫大字，將「保民生 剪布啱」六粒大字寫喺巨型卡紙上，仲要擺喺會議廳門口「曬乾」，博上鏡之心，路人皆見。
葉劉當睇唔到
社民連長毛梁國雄咁啱行過，實在抵唔住呢六粒字阻住個議事廳門口，所以將呢六張大字整亂佢，亂擺一通，仲將部份大字翻轉放。
經過嘅人都冇諗過幫亡國興撥亂反正，新民黨葉劉淑儀更加當睇唔到，繼續站立喺大堆亂晒龍嘅「亡國帖」中，氣定神閒咁同記者吹水。
亡國興知道係長毛惡搞佢啲大字後，大嘆「一個人嘅行為，反映佢嘅質素」。
但查實佢喺立法會扮曾灶財，四圍寫大字，確係極之阻街，兼墨汁氣味難頂，連保安大員都希望呢位尊貴嘅議員收番好啲嘢，以免阻到議員出入。
亡國興最後惟有「收檔」，查實長毛同亡國興嘅行為，都同樣小學雞。