咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
回憶最美，分別之際，總愛留戀，就算認識新歡，都想會喺新人身上去搵舊人嘅影子。無論係真，抑或精神自慰，莫耶斯其實幾似費格遜，所以今日同牽牛兄調一調，等我讚吓呢位曼聯新帥。
同樣嚟自格拉斯哥，喺蘇格蘭長大同成名，費格遜細個仲喺莫耶斯老竇教嗰支業餘隊踢過波，實在太有緣份嘞！費格遜教曼聯26年，係英超最長壽嘅領隊，莫耶斯就執咗愛華頓11年，排喺費格遜同雲格之後；佢哋兩個同樣對球隊忠誠，同埋亦得見佢兩位好識同球會管理層打關係，先做到咁長。另外，喺同一支球隊教咁耐，除咗忠誠，都好講求耐性。
喺球員管理上，佢哋好鍾意用青訓，費格遜有92一代，莫耶斯有朗尼同魯迪維爾。佢哋又擅長買啲物超所值嘅球員，費格遜嘅代表作有舒米高、雲達沙同尼曼查維迪，莫耶斯就有卡希爾、派拿同阿迪達。唔好以為莫耶斯唔識買貴嘢，佢買費蘭尼用咗1,500萬鎊，對於愛華頓嚟講已經係天價。面對唔聽話嘅球員，費格遜毫不留情，如史譚、碧咸同堅尼；莫耶斯同樣企得好硬，包括送走一心想去曼聯嘅朗尼。費格遜最出名係佢嘅「吹風機」，鬧人唔會留情；前愛華頓球員基爾賓尼話莫耶斯嘅「吹風機」仲勁，直情係工業級嘅吹風機。
戰術上，莫耶斯同費格遜一樣，都鍾意玩兩翼，佢今季就係靠巴尼斯同派拿嘅左路入唔少波。費格遜有時會改造球員，莫耶斯都識，今季佢就將費蘭尼由防中改踢前鋒，效果唔錯；當然，費格遜係鍾意掉返轉，將啲前鋒造改防中。寫寫吓，個心越嚟越覺得莫耶斯唔錯；無論係真，定係自我催眠，球迷總要支持自己球隊嘅領隊。相信佢啦！文：咖喱