咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
臨近季尾，今次轉個角色玩插人；摩連奴一直係小弟好欣賞嘅領隊，由帶領波圖神奇勇奪歐聯，到車路士時期同曼聯領隊費Sir爭霸，轉到國際米蘭，作客魯營淘汰巴塞一役，喺雨中跳舞，仍然歷歷在目。摩連奴對工作熱誠，對大戰部署，世界上真係數一數二，衰在經常利用傳媒炒作達到個人目的，平心而論，佢已經達到走火入魔程度。
小弟作為一個傳媒工作者，當然也希望本身負責嘅項目，有摩連奴一樣嘅從業員；佢在任車仔領隊期間，為《太陽報》、《每日郵報》等提供無窮材料，皇馬期間，亦都係《馬卡報》、《阿斯報》、《每日體育報》等頭版常客。
今年初摩佬同卡斯拿斯交惡，起初傳媒還認為「聖卡斯」因主播女友關係，背後放風影響皇馬，但越嚟越唔對路，就算卡斯拿斯復出，佢仍然只列後備，甚至球隊輸波，摩連奴批評嘅，竟然係冇份打嘅卡斯拿斯。
嚟到季尾，皇馬雖然爭西甲失敗，不過在西盃決賽面對馬體會，好歹也不希望今季主要錦標全數落空，但喺呢個緊張關頭，又輪到摩連奴傳出想雪藏中堅比比嘅新聞。
摩連奴同比比同屬葡萄牙人，過去關係密切，但突然間搞不和，呢個「陽謀」咁明顯，其實都係為咗令球會覺得，摩連奴同隊員不和，迫使球隊炒佢。
摩連奴一向唔愁後路，車路士、聖日耳門等大門都等緊佢，特別佢返車仔，英國新聞界自然高興，因為大把可炒作新聞。但今時今日嘅摩連奴，如果唔去專注本身教練領隊工作，一味炒作是非，總有被唾棄一天。文：牽牛