【綜合英格蘭外電】費格遜光榮退休，但在曼市另一個角落的文仙尼卻夾着尾巴執包袱。消息指曼城將於10日內開除文仙尼，並以其副手傑特出任臨時領隊，領軍踢埋最後兩場英超。
但他不愁沒有出路，事關有報道指下季重返法甲的富豪球會摩納哥，欲邀請他出任教練一職。
英國傳媒在英足盃決賽前爆料，曼城將於今夏換帥，以現於西甲馬拉加執教的智利教頭比歷連奴，代替現任領隊文仙尼。但曼城上周六把英足盃冠軍獎盃輸給韋根，藍月亮班主蒙蘇及會長穆巴拉克決定於10日內解僱文仙尼，而多間博彩公司亦已將文仙尼的離隊盤口封盤。
比歷連奴否認過檔
英國《每日郵報》周一披露，由於曼城在今季英超還有兩場比賽，加上於本月23日及25日會於美國與車路士進行兩場季後友賽，故如會方決定提早踢走文仙尼，就會委任文仙尼的助手傑特擔任臨時領隊，甚至由球會的足球大使韋拉串演領隊一職。
另一方面，儘管比歷連奴矢口否認會過檔曼城，但英國《鏡報》指曼城同意向馬拉加支付200萬鎊（約2,400萬港元）贖身費後，比歷連奴將於周四落實成為曼城新帥。至於文仙尼跟曼城的合約雖然到2017年夏天才屆滿，但消息指其合約內列明如被開除，最多只獲賠償一年薪金，即大約700萬鎊（約8,400萬港元）。
網民洗版：文仙尼上車就好玩
球迷小丙：「文仙尼上車，賓賓（賓尼迪斯）入城，咁就好玩咯！」
bagio：「文帥希望你唔響曼城，但仍可以繼續留在英超其他球隊執教；英超冇咗巴神……遲吓可能冇埋哨牙蘇，肥仔朗尼……如果冇埋你響度搞gag，英超會少好多樂趣！」
YU_memory：「睇嚟之後都係返意甲，得番足總盃都搞成咁，爭唔落！」
Lazyworker：「其實文仙尼走都已成定局……，一齊期待吓新領隊好過啦！」
matt-sir：「我係挺文生，但我認為佢係應該走，亦希望佢有好嘅前程！」
keith091：「手執雙天至尊牌都輸，老細唔炒自己都要起身啦！」
資料來源：uwants.com