一年一度嘅港姐選舉又開始招募，無綫噚日安排咗近幾屆嘅港姐冠軍張嘉兒、朱晨麗、陳庭欣，同埋去年嘅三甲張名雅、黃心穎同朱千雪等喺尖沙嘴出席《2013香港小姐選舉》本地招募造勢。舊年無綫創新大搞一人一票投票，可惜最後衰收尾。
今年無綫未知有乜新意思，但佢哋招募女仔嘅條件就公佈咗，歡迎年齡介乎17歲到27歲嘅女仔參加。往年海外佳麗質素都強過本地薑，今年未開始已經爆出有熱門，有指樂基兒個24歲妹妹Crystal好有興趣跟家姐一樣加入娛樂圈，據知佢會以三藩巿海外佳麗身份參賽，雖然樂基兒反對，但幾經落嘴頭得到媽咪支持，仲做埋提名人。
衞世輝讚順眼
無綫非戲劇分部經理衞世輝話海外招募啱啱完咗，暫時未聽到樂基兒妹妹Crystal參賽，當記者遞咗Crystal張相畀佢睇，佢笑笑口大讚：「基本條件OK，望落幾順眼。」相信如果Crystal參加入圍機會好大。
無綫話視乎佳麗質素決定入圍人數，初步預計20人，分別喺8月進行準決賽，9月1日總決賽，仲會分組去8個地方拍外景。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！