呢口烏氣不吐不快。「今早可以穿這個了！」着上黑色、印有「Champions 20 Times」T恤嘅李克勤，噚日晨早流流7點幾update微博，慶祝曼聯喺主場奧脫福球場捧走第20個頂級聯賽冠軍，同埋領隊費格遜（費Sir）執教曼聯26年以嚟，第13個英超錦標。
而簡簡單單嘅呢幾隻字，已經流露咗克勤對曼聯，同埋費Sir嘅熱愛，係超越一般嘅曼聯迷。費Sir最後一場正式領軍將會作客對西布朗，之後就光榮引退。
猶記得8年前，克勤嘅「厚禮」被彈回頭，搞到俾高登仔戲稱做送禮勤，自此佢對曼聯嘅一舉一動，都放喺心底，好少公開表態。不過今次費Sir咁威，呢位超級曼聯粉絲終於忍唔住啦！
連李珊珊都有感而發喺微博留言話：「新聞不斷播放有關費爵爺主場的最後一戰。看着看着，我的眼眶濕濕的……從開始認知『足球』這東西；他，已一直在……告別總教人難受，更要適應沒了他的足球世界。此刻感覺就是怪怪的……只能說，再見了。感謝你。Sir Alex Ferguson。」
播廣告辣㷫球迷
講開又講，噚日凌晨曼聯踢完場波後，輪到費Sir致辭，場面勁感人，點知有線足球台突然播廣告，仲要係超長嘅廣告，搞到一班本地曼聯迷聽唔到費Sir嘅肺腑之言，明明開心嘅時刻都變成一肚火。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！