早前香港電影金像獎，架上墨鏡的大導演王家衛，罕有地頒獎而非領獎。人稱「呂姐」的資深沖印師呂麗樺，也罕有地從幕後走到幕前，從他手上接過「專業精神獎」。她是王大導的御用沖印師，1990年《阿飛正傳》開始的老拍檔。「咁多間（沖印）房，佢係要我呢間！」在她口中，這份工作好悶，最初吸引她留下來的原因，竟然是「唔使着裙返工」。
記者：譚淑美 攝影：胡智堅
「當我知道得到呢個獎，個心好恨王家衛頒獎畀我。做佢嘅戲，提高咗我嘅知名度」，50多歲的呂姐說得坦白。王導出名慢工出細貨，《一代宗師》籌拍時間長達10年，拍《2046》被嘲笑不知是否拍到2046年，這點呂姐最有資格說。「一般電影完成後拍出約50、60萬呎菲林，佢最多可以拍100萬呎，但好老實講，佢知道自己拍緊乜。佢係一個好認真嘅導演」。
呂姐一生人只打過一份工，就是沖印師，專長是調色，明年將慶祝入行40周年。「頭10年都只係學徒，每朝返工就係掃塵。我哋係唔可以有塵在枱面，因為底片唔可以有塵，否則形成畫面中嘅黑白點」。
金像獎典禮上，王家衛致辭說：「一套電影嘅製作，導演可以NG，演員可以NG，攝影師可以NG，但係沖印就唔可以NG，因為黑房嘅NG，會將所有心血化為烏有。」為確保沖印不NG，呂姐在開工前，總不厭其煩地花兩小時檢查機器、藥水、做測試，天天如是。工作沉悶？未算，毛片在未曝光前，要先沖印一次，而王家衛的毛片長達100萬呎，較放映版本10,000呎足足多100倍，但是呂姐絕不介意，因為她是按呎收費的。
沖印特效 營造污糟感
一套電影超過3,000個鏡頭，呂姐按導演要求調色，王家衛浪漫主義的電影風格，造就今天她懷裏的小金人。「我好感激佢，畀我試好多嘢，因為佢喺眾導演之中，要求最多沖印特效。例如《春光乍洩》，佢想要好粗、好污糟嘅感覺，我就不停將電影翻印，亦調整藥水，造成粗粒效果，其實係好大膽嘅嘗試。又例如《東邪西毒》，佢要有黃沙大地嘅感覺，我就幫佢沖印比較粗糙嘅畫面」。最後，她還要按數十間戲院的放映器，微調不同放映版本。
王家衛的《花樣年華》、《重慶森林》、《2046》等，以及其他導演的《無間道》、《黑社會》等著名電影，都出自呂姐的沖印房。她數不清這些年來，經她雙手沖印的電影共有多少部，但不論一級片還是三級片，她都認真處理。「你哋睇三級片，我係睇四級，因為我會睇埋未出街嘅（毛片）」。她生平最怕睇鬼片，但躲在黑房沖印鬼片卻好鎮定。「其實唔恐怖，因為冇聲效。我睇到啲鬼樣，只係覺得佢哋好肉酸！」
她不止是技術人員，還是色彩顧問。「阿Lam（林超賢導演）會問我有乜嘢可以玩呀？好似佢拍《綫人》，最後一場張家輝、霆鋒、桂綸鎂在學校有場打戲，用咗好重嘅綠色，去營造氣氛，呢個就係我嘅意見」。《一代宗師》的後期發行工作，她也有份。隨着數碼化來臨，呂姐亦要跟相伴大半生的菲林說再見，未言退休的她，早已掌握數碼技術。
每套電影，她翻看不下數十次，記者以為她不會入場看電影，誰料她是影痴，不單去戲院，還會回家煲碟。「工作時只係睇顏色、有冇花痕，我唔會走去留意套戲講乜！」
你想爆？幫你爆！
熱線電話：2990 7225
mailto:[email protected]
WhatsApp：9131 4511