港股升到去23300水平，基本達到晉佳4月預測嘅反彈目標，之前提到美股日股超買嗰啲因素都唔講太多，今日重點講大家關注嘅日圓。基本上，睇住日圓走勢，大概可以估到日股後市表現。
上周五晚執筆之時，美元兌日圓去到101.50左右，已超越日本官方認為合適嘅95至100水平，但仲可以接受。其實當初喺日本大搞量寬初期，已經講過日圓去到110左右，日本就識得驚。即係點？晉佳估計日圓去到105或以上，日本央行同市場會開始驚定日圓失控，直奔110令人擔心水平，到時一定會影響股市表現；相反，如果圓滙去到105就掉頭，市場又會覺得量寬政策開始推唔低日圓，懷疑刺激通脹失敗，到時日股一樣見頂回落。
所以，近排圓滙走勢繼續值得大家關注，而用圓滙嚟估計日股幾時見頂亦最合適，咁計去到104就算係日股警號，到時環球股市又可能開始被推低。事實上，最近連追落後嘅港股都已經超買，本周真係炒得一日得一日，中線揸大股？No way！
歐盟徵稅 阿爺料打救
個股方面，上個周最叻係一批低殘中資股，起勢追落後，就連疑似假數股中聯重科（1157）都爆升一成。相信大家都明白遊戲點玩，短炒就係「唔理好醜，但求死狗」，越死狗就越有機會爆上。
數未認真爆上嘅低殘熱門股，仲有光伏股保利協鑫（3800）。上周有歐盟委員會計劃6月份開始，對中國光伏產品徵收最高67.9%嘅進口關稅。不過，光伏股喺壞消息之後，股價反應又唔差喎，其中卡姆丹克（712）上周五反彈5%，即係壞消息後兩日仲有得升；至於保利協鑫捱過下試保歷加通道中軸一關之後，又有啲支持力，上周五都升2.6%。
雖然光伏股已經冇得計基本因素，但歐盟玩嘢之後，壞消息出盡，相信之後就會有內地推扶持政策幫光伏企業度過難關，只要有潛在好消息就有得炒，保利協鑫要升番一成左右，難度未必大。
晉佳
本欄逢周一、三及五刊出