投行賓架嘅光環逐漸褪色，早年仲話可以轉去做私募基金，但係個市根本唔就好難食糊，𠵱家最穩陣可能係上岸做上市公司高層，最好就係透過工作機會，同各上市公司老闆打好關係，博日後獲邀過檔。
難與內地官二代競爭
好似財經公關公司皓天（1260），其新任CEO謝文釗（Jerry）之前係永暉焦煤（1733）財務總監，佢話因工作關係認識皓天老闆，傾傾吓發覺好啱key就索性轉工。
分別喺中金再生（773）同旭光（067）做執董嘅馮嘉倫同余孟釗，佢哋就係負責湊住公司上市，同老闆關係好又幫得手，早兩、三年離開投行成功上岸。
投行競爭大，賓架對外要爭生意，對內又要同好多新加入嘅內地賓架競爭，佢哋唔少仲係後台夠硬嘅官二代，隨時搵一單國企上市刁，已經抵得住一個香港賓架搵三、四單細刁，加上投行不停汰弱留強，呢個熱廚房，有好路數梗係閃啦。