上市公司設計紀念品嘅意念層出不窮，通常攞啲招牌嘢出來，恒生銀行（011）早排就整咗款印有招牌財神嘅八達通。華華早前去利豐（494）位於長沙灣嘅總部，跟同系利亞零售（831）嘅高層傾偈，先發現利豐用老闆馮國經、馮國綸嘅嘜頭做紀念水杯，送禮自用。
呢隻杯係利豐2006年慶祝100周年嘅紀念品，上面濃縮咗利豐百年發展嘅代表相片，仲有創辦人馮柏燎同第二代馮漢柱（箭嘴示）個樣，三代同堂喺晒隻杯度，屬非賣品。講開又講，利豐大廈守衞都幾森嚴，華華一行入利豐門口，就有兩道紅色圍欄，欄住個幾十平方呎嘅位，仲有兩位保安把守，就連詢問處都行唔到埋去，要利亞搵人出來接。聞說今年初有內地供應商上門抗議，同守衞森嚴有冇關係呢？