【本報訊】結好控股（064）早前以32.5億元將澳門氹仔的金都酒店售予銀娛（027），雙方各取所需，不過，交易仍帶「遺憾」，「成個金都酒店項目最對唔住嘅係台灣新光集團，我欠佢哋一個人情！」結好主席洪漢文接受《爽報》專訪時如是說。
2011年1月，結好以每股0.51元，向台灣新光集團旗下新光基金發行2.24億股，及另斥資2億元，與新光集團下新光資本成立合營公司，經營澳門金都酒店之商場及娛樂設施。
洪漢文表示，「當初真係想同新光一齊搞旺金都，尤其以新光喺台灣搞開百貨公司嘅經驗，不過之後無耐就有買家想一手過買起金都，所以先至同新光嘅合作hold住！」但他同時強調「呢個人情一定要還！」
拒割喉減佣吸證券客
「回想當年，買金都係為咗幫朋友，佢做得唔係咁好，所以幫手攞嚟做囉！」金都落入結好手上幾年，成績不過不失，洪漢文指年年有錢賺，只是要依會計準則而做減值撥備，「如果要再做金都唔係唔得，不過可能要重建再搞大佢先至有得同人鬥，計過條數唔係咁抵博，既然有人有興趣，又好價錢，賣咗佢套現再搵過投資機會仲好！」
至於還新光甚麼「人情」，洪漢文透露「已經幫新光喺香港搵到個partner，係香港南豐集團，佢哋合組咗個基金，主要做股票同物業投資」，他補充，「佢哋呢個基金將會成為結好嘅投資機會。」
談及結好的本業證券業務，洪漢文謂相當穩定，並強調結好不會仿效其他華資行割喉式減佣吸客，「咁樣做冇意思，最緊要啲客賺到錢，所以我寧願啲孖展（放貸）鬆少少，等佢哋有多個投資機會！事實上，我哋最主要都係賺貸款個part。」不過他強調不會盲目放數，「我每朝都晨早番嚟睇啲客嘅持倉情況嚟釐定孖展額。」目前結好放貸予證券客戶的利率約為最優惠利率加3厘。