出名牙尖嘴利嘅豐盛資產管理董事黃國英（Alex），上星期六晚喺灣仔伊館搞咗場talk show，雖然入座率只得七成，但無阻Alex發揮其寸嘴本色，寸盡基金界同股評人，其中一個寸位，佢話金融海嘯後，好多股評人叫「大師」，專門幫啲股份「打齋」。
開talk show自嘲坐唔滿
Alex甫出場即自嘲個場坐唔滿，仲伺機擺青姐上枱，話「唔似青姐咁出名，有人搵佢賣廣告」，之後講到點樣揀名牌股，又借題發揮，話「公司搵代言人sell產品，賣3,000蚊嗰啲肯定好過賣30蚊」，暗寸青姐幫大家樂（341）代言30蚊午市套餐。
Alex亦唔放過同行，話自從金融海嘯後，散戶聞股色變，所以好多股評人都叫「大師」，「啲股份好重怨氣，佢哋唔係做推介，係打齋！」
爆基金界「有人呃飯食」
講到基金界，Alex去得更盡，竟然唔怕俾人告、夠膽死話唔少行家都係呃飯食，大會螢光幕旋即出現兩張大頭相，雖然打咗格仔，但一睇就估到係城中一男一女基金大好友，成功博得觀眾掌聲。
Show後問番Alex，先知佢一個人度晒講稿，由初稿到最終版，大概用咗兩個月，佢亦滿意自己嘅表現，至於下年會唔會添食，就要睇市場反應。其實個show仲有唔少投資金句，例如品牌股要「買西唔買中」、工業股就「買下（游）唔買上（游）」，秉承到佢句句金嘅作風。
李華華
mailto:[email protected]