一講去天后搵食，大家只會想到大坑，其實一出地鐵，銀幕街到電氣道一帶都不斷有新食肆進駐。曾住在天后一段日子，別後多年，發覺除了清湯腩不變，各式居酒屋、甜品店、台灣小食等都齊集於此，各具個性。沒有大型連鎖食肆，沒有人逼人，愛天后就是愛這裏的悠閒。
記者：歐陽曉思 攝影：劉永發、潘志恆
模特兒：Paris@Pure Models
居酒屋 主攻另類佐酒菜
日本菜在香港像一團永遠不滅的火，甚至可以用越燒越旺來形容，拉麵、居酒屋、燒肉等遍地開花，最新一員居酒屋Zawa Zawa落戶銀幕街，老闆Danny看中天后食肆的潛力，於是開一間集結日本飲酒文化、多元化食物、氣氛輕鬆的居酒屋。「之前看過大坑同銅鑼灣啲舖，但租金真係好貴，本來無諗過呢頭，過嚟見到呢間兩層嘅舖好啱做居酒屋，又發現呢度無同類型嘅嘢，所以即刻扑槌！」Danny笑說。這裏的裝潢似足日本的居酒屋，木色外牆加木裝飾，甫入店，發現牆身桌椅都是原始木料，配上型格吊燈，有種原始的玩味。食物主打佐酒的Fusion菜，特別推介海之幸忌廉餅，用上新鮮的蝦蟹拌入忌廉汁，置在鮑魚上炸香，入口脆卜卜，非常矜貴。若你喜歡吃串燒的話，就推介翠玉瓜釀雞翼，師傅將雞翼夾着爽甜的翠玉瓜，肉汁滲在瓜身上，口感與別不同。有得食當然要有得飲，潮流興飲手工啤酒，Danny亦引入日本的Baird、COEDO等Craft Beer，最重要是這裏豐儉由人，從數十元的日本啤酒，到千多元的清酒都有，大家可把握每天Happy Hour買三送一的優惠，實行飲多啲平多啲！
Zawa Zawa
（2570 0004）
地址：天后銀幕街21號地下
甜品店 自製住家煙韌丸子
天后已成為港島區食甜品的好去處，在筲箕灣已打響名堂的甜品老媽於天后再下一城。30歲的靚仔老闆Vincent辭掉了會計師的工作，一心一意打理新店。「很多人都話天后甜品舖競爭太大，其實我覺得呢度甜品市場仲大，晚晚十二點一點仲好旺，同埋好彩我哋喺筲箕灣都算有啲名，好多食客專登嚟幫襯！」天后新店的牆上掛滿One Piece海賊王砌圖及Vincent在Artjamming時畫的海賊王畫，全部都係海賊王？因為他是海賊王迷，今次將收藏公諸同好，希望吸納顧客外，也希望海賊王迷到此交流！食物方面，當然少不了招牌「上元丸」，材料是炒過的花生、芝麻、糖冬瓜等，從炒材料到煙韌的糯米皮全屬自家製作，加上那不太甜的薑湯，有種家的溫暖感。喜歡吃西式甜品的可試甜酒果凍，用奇異果、士多啤梨等生果加入酒做成果凍，酸甜醒胃！
甜品老媽
（2566 5268）
地址：天后清風街18號地下
茶餐廳 大賣八十年代音樂
潮流興懷舊，看着現時的政府及特首，怎能不緬懷昔日的Good Old Days，香港80’s冰室老闆Tommy就從餐廳裝潢到食物，與你細說八十年代的興盛。一入餐廳，攝影師看到Tommy頭上那部稱為「大牛龜」的777舊式卡式收音機，興奮大叫：「我後生最想攞住佢去淺水灣炸機！」然後Tommy回應：「我又何嘗唔係！可惜嗰時無錢，呢個係我最近喺eBay Bid返嚟㗎！」Tommy受八十年代流行音樂的薰陶，曾是音樂製作人的他，監製過唱片及擔當演唱會的幕後製作，可惜近年香港音樂界大不如前，於是早年與弟弟夾份頂手位於炮台山一間茶餐廳，那裏的生意已上軌道，便退出再大展拳腳，為何用八十年代做Gimmick呢？「八十年代好過癮㗎，你會睇到啲人由窮變有錢，人工幾級跳，仲有當時的偉大發明Laser Disc，可惜香港之後……所以我想話畀啲後生聽，香港以前好好㗎！」牆上一邊貼滿瘋魔當時少男少女的Boy George、U2等的照片；另一邊就貼上舊飛機照片。冰室食物除有街坊口味的常餐、茶餐等，也有蓮子冰、滾水蛋等不少懷舊美食， Tommy更打算重拾結他，晚上加開Live Band Show及賣糖水，等客人可以一路食糖水，一路聽返當年的音樂，更加有Feel！
香港80's冰室
（2510 1335）
地址：天后電氣道90號地下
小食店 即製蛋餅
荃灣「小倆口」不見了，不用擔心，搭港鐵來天后就行了！小記一直很喜歡「小倆口」這名字的由來，創辦人石玨鳳熱愛麵包，曾到日本學做麵包，但因一次意外，令右手殘廢，無力再「親手」整麵包，但又不想終日在家無所事事，於是為重建自尊便開設台式三文治店，丈夫更馬上辭工支持，因而命名為「小倆口」。不過今次天后重開的小倆口就沒有三文治，改為主打漢堡和蛋餅，大部份材料依然來自台灣，跟台灣同樣即叫即製，絕對新鮮熱辣。小記最愛這裏的蛋餅，用上台灣入口的葱油薄餅加上煎蛋，配料可選肉鬆或燒肉等，加點蒜茸油膏，食法夠正宗。
小倆口台式漢堡蛋餅專賣店S-Yoco
（6402 6976）
地址：天后電氣道96號地下