如何成為一隻靚殼？三個條件：冇業務、現金多、股權集中。天地數碼（500）三者俱備，加埋猛料後台中信集團，配合內房借殼上市潮，升勢一觸即發！
天地數碼現價0.47元，市值5.36億銀，大股東中信集團當年接貨平均價1.50元，現價輸足七成；第二大股東高振順，前年以55仙大手增持，仲坐艇15%。兩大股東一身蟹貨，如何反敗為勝？可能性有兩個：一、中信注入房地產業務，變身內房股；二、執靚隻殼，賣畀內房商。
去年8月，天地數碼賣出數字廣播業務後，基本上係一隻殼，零存貨，淨現金5.1億元，相當於市值95%，仲未計殼價。早排有上市公司高層說殼價越來越貴，主板股隨時要5億先有交易，可見現價買入，5億cash雙手奉上。要上番中信成本價，潛在升幅兩倍。
睇盛高置地（337）獲綠地借殼後的升幅，小注買入天地數碼，應屬低風險、高回報的投機，目標先睇6毫。
魏力
http://www.facebook.com/2012jason
本欄逢周一、二、四、五刊出