西甲榜首巴塞隆拿上周六，多得皇家馬德里作客同愛斯賓奴以1:1和波，提早奪得聯賽冠軍。由於上周六係恩尼斯達29歲生日，所以呢一日對小白嚟講多咗一重意義。佢隊友丹尼爾唔等埋隊友，喺屋企攞支香檳出嚟，自己慶祝定先！
小白雙喜臨門
皇馬上周六作客愛斯賓奴，收起一班主力，正選後衞沙治奧拉莫斯喺後備席，同隊友基斯坦奴朗拿度合照，笑得勁開心。但係最後1:1打和，令到死敵巴塞可以提早封王，唔知佢兩個賽後仲笑唔笑得出呢？不過，一班巴塞球員就一定笑到見牙唔見眼。丹尼爾仲「偷步」喺屋企慶祝，拎住支香檳影相，仲數自己呢幾年拎咗幾多個冠軍，擺明晒命。Nike亦即時出相，賀巴塞奪標。
法比仔首個西甲冠軍
佢仲同滿29歲生日嘅恩尼斯達講生日快樂，仲賣晒口乖：「今日係我偶像生日，好榮幸可以同佢同隊。祝恩尼斯達生日快樂！」小白自己都喺facebook上載咗張蛋糕相，話自己收到最佳生日禮物：「啱啱滿29歲生日，收到最好嘅生日禮物，就係得到聯賽冠軍，對一整年努力嘅肯定！We're champions！」
至於其他巴塞球員都有喺面書或者twitter，留言慶祝提早奪冠。碧基好似對皇馬賽果有啲意外，而法比加斯就好開心，因為呢個係佢第一個西甲冠軍，亦係球員生涯第一個聯賽冠軍。