今日係母親節，唔少媽媽級明星都應該會同仔女出街慶祝，但美國型女歌手Gwen Stefani噚日就搶閘賀佳節，帶細仔Zuma去洛城一個動植物公園玩，睇怕都係因為Zuma日前送咗張愛心賀卡𠱁到媽咪好開心啦。Zuma喺Gwen嘅陪同下，坐上旋轉飛鷹玩餐飽，始終Zuma係男仔，唔通走去騎旋轉木馬咩，但冇諗過𡃁仔同阿媽一樣咁有鏡頭觸覺，輕易發現狗仔隊影相，佢仲即時手指指，慌死人哋唔知佢係話「我見到你啦」，咁狗仔隊又點會錯過呢個「老鷹與母子」精采場面？之後兩母子喺公園閒逛，Gwen原本舉起把遮嚟擋太陽，Zuma搶咗把遮玩，仲整埋啲古怪表情，睇嚟佢呢日一定係玩得好開心喇。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！