今日係費爵爺最後一次喺夢劇院領軍，英國多支殿堂級樂隊包括The Smiths、New Order同埋The Stone Roses等都會嚟奧脫福參加派對，仲會喺開波前兩小時獻唱19首歌曲，用音樂嚟歡送費爵爺。睇嚟呢個費爵爺主場告別騷，分分鐘精采過舊年嘅倫奧閉幕典禮。
摩帥怕喊今日唔現身
曾喺英超同費格遜鬥到你死我活嘅摩連奴，自爆話係費爵爺致電話佢知退休。喺皇馬執教嘅佢表示：「當費爵爺打電話話我知佢決定退休時，我覺得好榮幸，但同時又詫異又悲傷。我哋係好朋友，但禮拜日我唔會去睇佢場主場告別戰，因為我唔想喊。」另一方面，有傳車仔班主阿巴莫域治唔肯幫摩佬畀1,700萬鎊（約2億港元）贖身費，如果係真，下季佢就可能冇機會同曼聯新帥莫耶斯鬥智鬥力嘞。
判官大利曼聯
邊個球證咁好彩，可以喺今日費爵爺場告別戰執法呢？唔係韋比，係摩斯呀。42歲嘅摩斯今季吹過曼聯兩場英超，結果紅魔都贏晒，分別喺主場贏西布朗2:0，同埋作客贏史篤城2:0；睇嚟呢位球證都幾旺費爵爺。唔知摩斯吹完場波後，會唔會問費爵爺攞番啲嘢留念？
韋根老細後悔冇買紅魔
韋根老細韋倫自爆話喺1990年，原來可以用1,150萬鎊買起曼聯，點知佢老婆認為曼聯敵對球迷太多，直指佢咁做擔心會影響JJB體育用品店嘅生意；結果，佢聽咗老婆嘅意見冇買到，但咁就走咗寶。費爵爺一手將曼聯變成大金礦，唔怪得韋倫𠵱家講番都話悔不當初啦！