一切很美只因有你。由陳慧琳（Kelly）唱給雷頌德（Mark）聽最適合不過。她在樂壇上有今時今日的成就，阿Mark幾乎佔了所有的功勞。18年來二人合作無間，看似順風順水，其實一開始便觸礁，第一首歌便被抨擊，全靠阿Mark在背後力挽狂瀾，當年作為新人的Kelly也完全不知情。
撰文：李珮洳
陳慧琳在95年出道，在經理人黃柏高（Paco）介紹下第一次與雷頌德見面，Kelly記得當日去學唱歌，唱了兩首難度十分高的歌曲，她說：「我記得當時唱咗兩首歌，一首係王菲一首係彭羚，佢兩個啲歌出名難唱㗎啦，心諗今次死硬啦，仲要當時阿Mark係Paco叫佢去聽吓我唱成點。我好記得阿Mark聽完我唱歌，只係話把聲幾好聽，但係高音位要練多啲。」在旁的阿Mark笑笑說：「嗰時我第一次見呢個女仔，第一個感覺咁靚女，得呀，因為第一個觀感有100分做歌手好緊要㗎！」
新歌冇人播
接着阿Mark便開始着手為Kelly創作新歌，他說：「我記得Kelly出道時有電影同埋廣告配合一齊出，作為新人真係好難得有咁多宣傳，心諗今次做呢個新人真係實食冇黐牙啦，點知最後係黐晒牙。首歌畀人話音樂聲太大遮晒Kelly把聲，再加上佢上完電視節目第一次唱live俾人話佢好生硬，首歌唔好話上唔到電台榜，直頭係冇人播呀，成件事出咗嚟效果唔係我嘅想像咁樣。」最後阿Mark要將《一切很美只因有你》再造過另一個版本，結果成為電台兩星期的冠軍歌。
從這件事令阿Mark得到的教訓是做人不要過份自信，不過同樣令他日後做事不輕易放棄，他說：「唔好過份自信之餘亦要相信自己，冇嘢係做唔到，可能咁多年嚟我同Kelly咁合拍嘅原因之一，係我哋兩個對自己要求好高，工作上大家都對大家好嚴厲。」合作18年，Mark與Kelly的火花沒有褪減，Mark表示日子越耐壓力比以前更大，他說：「因為Kelly成就已經好高，𠵱家幫佢造歌就要諗吓點先可以超越到之前嘅成績，總之首歌佢第一個感覺唔鍾意我就會掟，因為改都冇意思。」
錄歌錄到喊
由於阿Mark於下月21日到23日在紅館舉行「雷頌德Thank You演唱會」，曾與他合作過的好友紛紛支持，Kelly當然義不容辭唱足三場，在選歌過程中他們回憶起不少往事。Kelly自揭多年前錄歌錄到喊，Mark即解釋：「唔關我事㗎，唔係我鬧佢，係佢自己唱極都唱唔到又心急就喊，佢喊完發洩咗就冇事㗎啦。」提及阿Mark多年來不斷被指抄歌的負面新聞，Kelly第一時間力撐好友說：「呢啲新聞我真係好戥佢唔抵，佢份人咁努力去做音樂都俾人話，不過我從來唔會問佢，因為我知佢咁大個人處理到。我好想話我有今時今日嘅成績，Mark係佔咗全部功勞，啲人鍾意我好大多數係鍾意啲歌。」原來Kelly經常與阿Mark傾訴心事，現時二人皆為父母親，大家見面的共同話題更加多。
髮型：George Shum(Kimrobinson Studio)
服裝提供：Pierre Balmain
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！