百富環球（327）嚟緊日子，肥過肥仔水，買。百富環球主打電子化交易終瑞機解決方案。以出貨量計，係全球第四大營運商，講優勢，好掂。又家陣包括金磚四國等新興經濟體，推動城鎮化，唔少地區政府，亦都積極推動電子化交易模式，所以，百富環球面向嘅「城鎮化」，係全球性。
再講，好似「Visa」及「MasterCard」呢類超級大孖沙，近年嚟就一啲發達國家好似花旗國，廣泛部署符合EMV標準嘅終端機，亦開正百富環球條水。係咁意計數，百富環球13、14年度，純利增長25%，到2.28億銀及2.86億銀，預測PE跌到得番8倍及6.5倍，吸引到痹。買百富環球，以2014年10倍PE做目標，要見2.75元，現價係要翻半番。
浩倫大折讓值博
浩倫農科（1073）對上星期五首棍陽燭，似嚟料。浩倫係呢個半年橫行位（0.345元）嘅NAV折讓，高達80%，今年半年度純利1.6億銀，已經過咗12年全年度純利1.37億銀，冇問題。而呢期類近板塊心連心（1866）半個月左右，爆升咗近五成，浩倫有point炒落後。短打博浩倫升20%到0.42元，未有耐到NAV。
錢雋