無綫重頭劇《金枝慾孽貳》深到唔明，嚇到師奶腳都軟埋，收視仲跌穿20點，認真慘情。話時話，《金枝慾孽》喺04年播出嗰陣，結局最高收視41點，不過最好睇嘅唔係劇情，而係幾位主角戲外嘅龍爭虎鬥。
當年無綫頒獎禮成為咗《金枝慾孽》主角嘅舞台，「如妃」鄧萃雯更加係視后大熱。點知頒獎禮當晚，雯女大熱倒灶輸畀「玉瑩」黎姿，全城大跌眼鏡，又喪鬧比賽唔公平，坊間仲盛傳黎姿幫無綫簽經理人合約，而雯女只不過係一般藝員合約，無綫為咗益親生女，先至違反民意。
黎姿梗係覺得委屈啦！第二日即刻上節目《香港直播》平反，其間有觀眾特登打電話嚟撐佢，搞到黎姿當眾崩潰喪喊。𠵱家諗番，當日《香港直播》收視分分鐘都高過20點呀！
撰文：阿Wow
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！