【銅鑼灣加寧街】商天娥啱啱先幫無綫節目《演嘢》做完主持，雖然個節目俾人投訴話悶，但係娥姐就叫觀眾唔好雞蛋裏面挑骨頭，睇嚟娥姐做人都好豁達，難怪佢自己越來越福相都唔介意。
吹水借廁所
前日3點幾鐘一身黑衣打扮，連對鞋都係黑色嘅娥姐，一個人去到銅鑼灣選購家品。佢先去到加寧街一間商場行咗個圈，不過普遍價錢可能唔合佢心意，最後佢選擇去到一間連鎖12蚊店度掃貨。佢入去之前已經有晒準備，手推車放定兩個購物籃，娥姐入到去對杯碟呢類家品非常有研究，見佢攞起每件都睇得好仔細，最後掃咗至少三套至滿足。跟住佢轉去買雜物，咕𠱸、吸濕器、枱布同餐具買咗成籃，為咗揀到最平最好，身形豐滿嘅娥姐仲不時踎低去揀，令佢豐滿嘅盛臀更加表露無遺，起身仲有啲辛苦。經過一小時知慳識儉咁搜購12蚊用品，買滿兩大籃埋單都只不過係158蚊。
辛苦完之後娥姐攞住一大袋戰利品行咗去就近嘅一間餐廳，以為佢慰勞自己坐低飲杯嘢，原來佢係入去借廁所。去完廁所佢仲同餐廳經理吹咗一輪水，跟手攞番袋戰利品去停車場攞車走人。
採訪、攝影：徐錦池
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！