【隔牆對論 】
記：《蘋果》記者
黎：黎堅惠（Winnifred），跨媒體文化人，曾任《號外》編輯、《Amoeba》總編輯、形象顧問、電台DJ
記：巨鴨是藝術嗎？
黎：巨鴨可以解讀為modern art（現代藝術），modern art嘗試顛覆大眾固有概念。隻鴨嘅shocking value係體積，放大後改變大家認為玩具係細細件嘅觀念，帶畀參觀者全新感受。當然，有人會唔認同巨鴨係藝術，無謂爭拗，你可以選擇like或dislike。
記：巨鴨為何在香港得到咁多關注？
黎：我認為係因為timing（時機）。香港呢幾年好沉鬱，政府唔值得信任、住屋貴到驚人、空氣又差，社會瀰漫窒息氣氛。隻鴨橫空出世，當然唔可以改變一切，但佢象徵嘅「童年」、「簡樸」，好輕易hit中好多人，令大家咁開心，成為一件「賞心樂事」。香港近幾年真係冇乜嘢「賞心樂事」，記憶中可以令咁多人開心嘅，都已經係1996年李麗珊贏奧運金牌。
今次展覽，值得搞公共活動嘅人去探討。因為，今時今日要捉住大家嘅attention（注意力），絕對係難事。身邊發生嘅事太多，包括數唔清嘅WhatsApp、電話、短訊，每樣都係要爭你嘅注意力，隻鴨幾乎一次過搶晒。
不過，所有事有光明就有黑暗，Rubber Duck亦都引出香港陰暗面，原來有人唔肯排隊，有人唔理勸告狂踩鴨公仔。呢個世界本來就係相對，問題係選擇企喺光明定黑暗一邊。
記：公共藝術貴乎公眾參與，但有批評認為，湧到朝聖的人群只為與巨鴨拍照，放上facebook罷了。
黎：去同隻鴨影相有乜嘢問題？自由社會，自由選擇。影相都可以係與藝術品互動方式。現今世界嘅各種limitation（限制），已經因為科技慢慢瓦解，例如影相唔再係專業攝影師專利，因為手機相機嘅進步，加上易用到死嘅軟件，人人都可以透過鏡頭表達自己、創造藝術。
最近喺網絡睇到好多人影嘅鴨相，都好有創意，係經過佢哋思考嘅二次創作。所以，巨鴨某程度上，都啟發咗部份人創作意念。
記：會覺得巨鴨太兒戲嗎?
黎：邊個人可以判斷藝術嘅高與低？流行曲都可以觸動人，都有人話黃霑、林夕嘅詞，提升咗廣東流行曲藝術成份；而且，你睇吓碼頭工人示威，許冠傑《半斤八両》歌詞，今時今日形容打工仔，一樣咁貼切。
記：巨鴨展覽主要還包括相片、巨鴨模型展示，評論認為都是較單向的展品，欠缺較少互動，也沒倡導公眾透過巨鴨反思。
黎：欣賞藝術係需要思考空間。好似王家衞拍嘅戲，每個人都可有自己閱讀版本。如果商場要好似博物館導覽咁，不斷導讀、解構隻鴨，會唔會畀咗一個框框，要大家睇到嘅嘢，都係一樣？
藝術係咪需要導讀？其實，喺互聯網勢不可擋嘅影響力下，大家易接收知識，唔再輕信專業，甚至懷疑，包括西醫醫學，係咪有病就要食抗生素？個人開始尋求自己信念，唔再由某某大師斷定乜嘢先係藝術。好似我𠵱家只係發表自己觀點，唔代表你一定要聽。
記：每次有藝術展如《畢加索──巴黎國立畢加索藝術館珍品展》等吸引大批市民，總會有人質疑港人「都係趁墟啫」。
黎：香港人唔識欣賞藝術？我又唔覺喎。我認識一啲家長，經常帶仔女去博物館。有時睇到啲blog，大家對藝術嘅見解都好獨到吖。
不過，我唔會因為咁判定香港人嘅藝術修養，因為我哋嘅觀感來自認識嘅人。呢個問題可以回應番我啱啱講嘅，每個人都有自己面貌，一竹篙打一船人嘅年代已經過去。
記：如果畀你搞，你會點搞呢個展覽？
黎：真係諗都冇諗過，因要帶唔多人認識嘅荷蘭藝術家作品嚟香港，仲要咁巨型，過程一定好艱巨，我自己問冇咁嘅魄力。𠵱家有人搞咗，大家可以做free rider，何樂而不為。
mailto:[email protected]