周刊的心理調查，九唔搭八，常常叫人揀不同的男伴，揀完才分析，原來揀A唔揀B，代表你對投資呀移民呀甚至教育的睇法，很騎呢。
我都想做山寨分析，請各位女讀者揀揀下列男伴：
一，送曲奇餅＋當歸中藥給女友的男伴。煲當歸還是在辦公室煲妥搞掂的，曲奇餅叫下屬排隊去買，也就是說，迫全世界欣賞他對女友幾咁細心體貼。
二，視談判桌如斷頭台，打死唔肯返回談判桌，開會時甚至說夠鐘食飯，以肚餓理由即刻離場的小老闆。男人急色唔講人知，急食卻通晒天，可是，文盲都知，食色性也！
三，幫老闆擋箭的超級打工皇帝，原來納稅過億的代價，是要誇大險情，幻想文革重臨，紅衛兵殺落香江抄佢老闆家！為了護主，男人自動波扮晒思覺失調，扮得太似，隨時會假戲真黐！
三種男人，做男友老公都揀唔落手，但三種男人極大機會當上未來特首，篩都唔走！冇得揀，佢老闆；他們做特首，我們唯有做世界！