凡事總有兩面，成敗得失好與壞，全是當事人的看法。被指為「富黛戀」第三者的苟芸慧，因緋聞帶挈豬籠入水，環繞她的是是非非，她看得通透，甚至不介意公開多謝郭富城，她說：「如果要多謝郭富城嘅話，就要多謝埋阿Lynn。」看來緋聞令她收入大增外，處事也變得更圓滑。
撰文：王崇穎
苟芸慧早前被指介入郭富城與熊黛林（Lynn）的戀情，致兩人分手。強調清者自清的苟姑娘受緋聞帶挈聲價十倍頻出騷，被指兩月內狂賺百萬。苟姑娘昨接受本報專訪，直認緋聞令工作量大增，但否認狂賺一百萬：「有少少誇張，唔知賺咗幾多，但一定冇呢個數。我唔否認多咗工作，都要多謝身邊幫過我嘅朋友。」會否特別感謝城城？她說：「真係好感恩可以同佢拍廣告，如果要多謝郭富城嘅話，就要多謝埋阿Lynn。佢哋分開真係好可惜，咁長時間嘅關係，冇人會知發生乜事。我本身冇做過（第三者），所以大家都會明白。」會否請城城吃飯致謝？她說：「佢哋分開已好可憐，仲要去多謝人呀？其實我同郭富城冇聯絡，上次係小美請TVB嘅人去睇演唱會，咁啱嗰日只有我一個藝人得閒。」
畀機會郭富城
對於有指Lynn當日矛頭直指苟姑娘，她說：「個女仔未必係講我，佢只係直接去講自己嘅睇法，若碰面我都會同佢打招呼，始終唔想工作上唔開心，成件事會慢慢證明。」她強調目前單身，以事業為重，問到若城城追求會否考慮？她不置可否：「𠵱家真係唔心急，我同佢喺工作上合作過，佢好專業同親切，我向來對事唔對人，所有人機會一樣，但一定要了解咗先，將來嘅事好難估，唔想將呢啲嘢講到咁死，人同人相處除咗性格啱，時間都要啱。」苟姑娘稱暫時絕不會與城城單獨約會：「單獨就一定唔會，工作上我OK。」
侍候雯女呻攰
去年有報道利用劇照指苟姑娘與謝天華車震，令她當場喪喊，更被家人質問，幸今次家人完全諒解，她說：「我同屋企人都仲係學習緊嘅階段，上次係第一次發生，個心好難受。今次第二次，我都進步咗，都有情緒化，但好快冇事，屋企人好明白呢個圈嘅工作，好信我，乜嘢都冇講同冇問。」她表示考慮買禮物作為母親節禮物，至於會否獎勵自己，她說：「我啲錢全部畀晒媽咪管，我想喺香港買樓，但未有香港身份證，要畀好多稅，過多三年先有身份證，等我儲多三年錢先。」
除與城城的緋聞hit爆外，苟姑娘有份參演的無綫劇《金枝慾孽貳》收視一般，但其飾演的宮女依然紅爆，更被指為「ABC宮女」，她說：「有聽到呢個名，幾得意，始終中文唔好，有呢個名令我第時有機會再做古裝嘅話，有進步人哋就唔會咁講。」她指有看內地古裝劇參考：「始終套劇好多四字成語，初初都未明，覺得要明咗、吸收咗先演到，有時喺呢個位會執着咗。」劇中苟姑娘飾侍候鄧萃雯的宮女，她稱未感太大壓力，只是盡力去演：「壓力係自己畀自己，總之有足夠嘅時間畀我準備，我會更有信心，身邊有好多前輩就當為學習機會。成套劇最辛苦係企喺雯女後面，宮女要一直企，企到腳軟。」眾花名中，苟姑娘坦言「肥苟」一詞對她傷害最大：「呢個名有少少唔尊重，但又控制唔到人哋講乜，所以要將壓力變成動力，努力減肥。」是否刻意增肥令城城卻步？她說：「冇諗咁多，好多嘢自己睇自己，好多人都鍾意我肥嘟嘟。」
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！