美國大導演米高曼（Michael Mann）即將開拍一部仲未定片名嘅動作驚慄片，部戲係以黑客同電腦科技為題材。男主角由《雷神奇俠》（Thor）中扮演雷神嘅澳洲男星基斯咸士禾夫（Chris Hemsworth）擔演，女主角有《寫出友共鳴》（The Help）獲提名奧斯卡影后的黑人女星維奧拉戴維斯（Viola Davis）同湯唯。
力宏湯唯演兄妹
噚日最新消息，王力宏都會加入演出，戲入面佢係雷神嘅同學，同湯唯係演兄妹。原來部戲之前都搵過何超儀去試鏡，但超儀噚日同馮仁昭講：「試鏡嗰日，咁啱係我唱片《八十再玩》有宣傳活動，加上睇到報紙，知道好多明星去試過鏡，對手好強，咁試鏡唔係一定得，唔通我唔去開騷走去撞牆咩！有報道話，其中一位女主角已落實咗湯唯演出，咁我真係唔明白電影公司點解仲要叫其他女演員去試鏡，係咪香港協調公司為咗湊夠數呢？」
之前超儀去參加奇洛李維斯（Keanu Reeves）導演嘅《太極俠》試鏡時，佢曾經批評過對方唔識貨同唔尊重佢，𠵱家又對米高曼嗰邊又有意見，睇嚟佢對荷李活嘅試鏡制度有好多不滿。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！